Fossar i fritt fall, vill vestlandsnatur og opplevingar frå fjord til bre. Velkomen til Svelgen, Leirgulen, Ålfoten, Davik og Botnane, der naturkrefter, historie og unike aktivitetar møtest.
Svelgen og bygdene rundt ligg omgitt av stupbratte fjellsider og djupe fjordar, og er eit flott utgangspunkt for opplevingar i heile regionen. Frå brevandring på Ålfotbreen til hjortemøte i Ålfoten, kystkultur i Botnane og spektakulær overnatting ved fjorden.
Vingenfeltet
Våren i Svelgen kjem med fossar i full kraft og natur som vaknar til liv. Det er ei fin tid å vandre Diktarstien i Botnane, der dikt av Jan-Magnus Bruheim møter deg i eit landskap som nettopp har vakna til liv.
Sommar er høgsesong for turar i fjell og dalar, fiske i vatn og elvar eller padle på fjorden. Ta turen opp til Ålfotbreen og opplev den vestlegaste og mest havpåverka breen i Noreg. Hjortegarden i Ålfoten er ope for besøk, der du kan mate hjort og oppleve dyrelivet på nært hald.
Hausten byr på klare dagar og sterke fargar i landskapet. Denne tida er perfekt for å du vandre i det spesielle hyllelanskapet. Dette er ei flott tid for fjellturar, fotografering og rolege naturopplevingar.
Vinteren i Svelgen er vakker og stille. Ved Karlskarstova i Myklebustdalen finn du preparerte skiløyper i flotte omgjevnader, perfekt for rolige skiturar.
Diktarstien i Botnane i Bremanger
Vingen-feltet i Bremanger
Landskapet rundt Svelgen er dramatisk og kontrastfylt. Området er eitt av dei mest nedbørrike i Europa, noko som gir liv til eit nettverk av fossar og elvar som pregar naturen året gjennom.
Like ved ligg Ålfotbreen, ein av dei vestlegaste og mest havpåverka isbreane i Noreg. Her møter du eit urørt og kraftfullt landskap med eit heilt unikt hyllelandskap i devonsk sandstein, forma av 400 millionar år gamle fjellrestar. Naturen er vill og storslått, og gir ei kjensle av å vere langt frå kvardagen.
Svelgen er eit godt utgangspunkt for opplevingar både til fjells og ved fjorden. Her finn du turmoglegheiter for alle nivå, både korte vandreturar og lengre fjellturar med utsikt over fjord og fjell.
Ein fin måte å bli kjent med staden på er kulturminneløypa, ei rundløype med fleire stopp som fortel historia om utviklinga frå gardssamfunn til industristad.
I Ålfoten, like ved Svelgen, kan du besøke Hjortegarden, ei unik oppleving tett på natur og dyreliv. Her kjem du nært hjorten og kan delta i aktivitetar som mating og enkle gardsopplevingar i vakre omgjevnader.
Området byr også på gode moglegheiter for fiske, padling og naturopplevingar langs fjorden. For dei som ønskjer meir utfordring, finst det klatring og buldring i fleire vanskegrader i området rundt.
Foto: Risevatnet i Svelgen @ Jostein Vedvik
Svelgen har ei historie forma av vatn og industri. Frå ei lita bygd voks staden fram på 1900-talet, driven av krafta frå fossane. I dag pregar industrien framleis både landskapet og lokalsamfunnet, og gjennom kulturminneløypa kan du oppleve historia på nært hald.
I området finn du også nokre av dei mest unike kulturminna i regionen. Vingen, Naturens Kolossalmuseum, er eitt av dei største helleristningsfelta i Norden, med tusenvis av figurar frå steinalderen. Området er verna, og kan berre opplevast med guide – ei reise fleire tusen år tilbake i tid.
Langs kysten i Botnane finn du både Diktarstien og dei imponerande gravrøysene frå bronsealderen. Her kan du oppleve natur, historie og litteratur side om side, i eit ope og vêrhardt kystlandskap.
I og rundt Svelgen finn du fleire overnattingsmoglegheiter – frå camping og gjestehamn til unike opplevingar tett på naturen.
I Davik ligg Davik Fjordparadis idyllisk til ved Nordfjorden, med rolege omgjevnader og gode turmoglegheiter. Ved fjorden kan du også bu på Hornelen Panorama i Leirgulen, med spektakulær overnatting i Sjøhuset eller Smia – begge med utsikt mot Europas høgaste sjøklippe.
Svelgen og bygdene rundt byr på opplevingar du ikkje finn mange andre stader. Her møter du kontrastane som gjer Vestlandet unikt.
Svelgen, Ålfoten, Leirgulen, Davik og Botnane ligg i Bremanger – Noregs naturlege aktivitetspark. Herifrå når du alt frå Ålfotbreen og Vingen til kysten og Hornelen på under to timar. Eit landskap forma gjennom 400 millionar år, der folk har levd og budd i over 7 000. Utforsk heile Bremanger her.
Sandane lufthamn Anda: ca. 65 km (ca. 1 time og 15 minutt)
Ørsta/Volda lufthamn Hovden: ca. 130 km (ca. 2 timar og 20 minutt)
Ålesund lufthamn Vigra: ca. 175 km (ca. 3 timar og 45 minutt)
Bergen lufthamn Flesland: ca. 270 km (ca. 4 timar og 10 minutt)
Det er direktefly frå Oslo og Bergen til Ørsta/Volda og Sandane. Til Ålesund går det også direktefly frå mellom anna Trondheim, London, København, Amsterdam, Frankfurt og Gdansk.
Svelgen ligg i Bremanger kommune, omgitt av fjell og fjord, og er tilgjengeleg med bil frå både Florø, Måløy og resten av Nordfjord. Turen inn til Svelgen går gjennom eit variert og naturskjønt vestlandslandskap.
Det går buss til og frå Svelgen med avgangar frå fleire delar av regionen, og det er gode parkeringsmoglegheiter i sentrum.
Det er også mogleg å reise sjøvegen med hurtigbåt frå Norled, med stopp i Leirgulen og Smørhamn. Dette er eit flott alternativ for å oppleve kysten frå sjøsida.
For oppdatert informasjon:
Foto: @ Hornelen Panorama
Svelgen, Ålfoten, Leirgulen, Davik og Botnane er del av Bremanger kommune. Bremanger er eit kystparadis der dramatiske fjell møter ope hav, med ikoniske naturopplevingar som Hornelen, Vetvika og Grotlesanden. Her finn du alt frå kvite strender og spektakulære fjellturar til levande bygder og ekte kystkultur.
Naturoppleving eller eventyr? Kvifor velje når du kan få alt i Nordfjord? Opplev den perfekte kombinasjonen av majestetiske fjordar, høge fjell, frodige dalar og ei vill kystlinje.
