På nordsida av Nordfjorden, i Stryn kommune, ligg dei idylliske bygdene Innvik og Utvik. Her møter du fjord, fjell og bygdeliv i eit landskap som innbyr til både rolege dagar og aktive opplevingar. Med kort avstand til kjende attraksjonar i Nordfjord er dette eit naturleg stopp på reisa.
Vinter på Utvikfjellet @ Saltnwax
Våren kjem tidleg langs fjorden, med grøne lier og snøkledde fjelltoppar som kontrast. Frukttrea blomstrar, og dette er ei fin tid for rolege turar og opplevingar nær fjorden.
Sommar er høgsesong for fjord- og fjellopplevingar. Turløyper, bading og aktivitetar langs fjorden lokkar både fastbuande og tilreisande. Sommardagane i Utvik er eit årleg høgdepunkt, med aktivitetar, torgdag og folkefest i sentrum.
Hausten byr på klare dagar og sterke fargar i fjellsidene. Frukt- og bærproduksjonen set sitt preg på landskapet, og gir ei roleg og stemningsfull ramme for turar.
Vinteren gir gode moglegheiter for ski på Utvikfjellet. På Breim Skisenter finn du både alpinanlegg og langrennsløyper, med utsikt mot fjellområda kring Jostedalsbreen.
Utsikt mot Innvik og Nordfjorden @ Dag Ulvedal / Visit Nordfjord
Briksdalsbreen i skumring, ein kort køyretur frå Innvik @ Ruben Soltvedt
Innvik ligg vakkert til langs fjorden, medan Utvik ligg lengre vest der fjorden opnar seg med vid utsikt både innover og utover Nordfjorden. Begge bygdene ligg langs riksveg 60, mellom Olden og Utvikfjellet, og er lett tilgjengelege for reisande i regionen.
Landskapet er prega av grøne lier, fruktgardar og fjell som reiser seg over fjorden. Her finn du eit levande kulturlandskap der jordbruk og fruktdyrking framleis står sterkt, og der menneske har levd i tett samspel med naturen gjennom generasjonar.
Innvik og Utvik byr på varierte turmoglegheiter, frå enkle vandringar til fjellturar med flott utsikt over fjorden. Kulturløypa i Innvik er ein lett rundtur på om lag 3,2 kilometer som tek deg gjennom bygda si historie, med stopp ved mellom anna Innvik kyrkje, prestegarden og den gamle kyrkjestaden på Hilde.
For dei som ønskjer seg opp i høgda, er Øvresetstøylen på Utvikfjellet eit populært turmål. Herfrå får du vid utsikt mot Våtedalen, Breim og ned mot Sandane. Turen passar for både gåande og syklande frå parkeringsplassen ved Breim Skisenter.
Om sommaren kan du bade og fiske i fjorden, medan vinteren byr på gode skiopplevingar på Utvikfjellet med både alpinanlegg og langrennsløyper.
Bringebær i Innvik @ Innvik Fruktlager
Innvik og Utvik har lange tradisjonar innan jordbruk, handverk og ferdsel. Innvik var tidlegare ein eigen kommune og eit sentrum i Indre Nordfjord, medan Utvik var eit viktig knutepunkt for ferdsel over fjellet og vidare over fjorden.
Eit særpreg ved Innvik er industrihistoria knytt til tekstilproduksjon. Gamle Innvik Ullvarefabrikk, etablert i 1890, er i dag eit viktig kulturminne og ei av dei største trebygningane i Europa. Her kan du oppleve utstillingar og arrangement som gir innblikk i lokal industrihistorie.
Også kyrkjene i bygdene er verdt eit besøk. Innvik kyrkje frå 1822 er ei åttekanta trekyrkje, medan Utvik kyrkje frå 1840 ligg vakkert til nær fjorden.
I Innvik og Utvik finn du gode overnattingsmoglegheiter tett på fjorden, med kort veg til både natur og aktivitetar. I Utvik ligg Fransøyra Hytteutleige heilt nede ved strandkanten, med moderne hytter, gode fiskemoglegheiter og nærleik til variert turterreng i skog og fjell. I Innvik ligg Innvik Fjordhotel idyllisk til ved vasskanten, med restaurant og terrasse med utsikt over fjorden, og eit godt utgangspunkt for turar i Nordfjord-regionen.
I begge bygdene finn du daglegvarebutikkar og enkle serveringstilbod. I Innvik har Skogstad eit eige utsal med kle til både kvardag og friluftsliv, med røter tilbake til 1937 og inspirasjon henta frå naturen i Nordfjord.
Sandane lufthamn Anda: ca. 45 km (ca. 50 minutt)
Ørsta/Volda lufthamn Hovden: ca. 100 km (ca. 1 time og 30 minutt)
Ålesund lufthamn Vigra: ca. 175 km (ca. 2 timar og 45 minutt)
Bergen lufthamn Flesland: ca. 270 km (ca. 4 timar og 15 minutt)
Det er direktefly frå Oslo og Bergen til Ørsta/Volda og Sandane. Til Ålesund går det også direktefly frå mellom anna Trondheim, London, København, Amsterdam, Frankfurt og Gdansk.
Innvik og Utvik ligg på nordsida av Nordfjorden i Stryn kommune, og er lett tilgjengelege med bil langs riksveg 60 mellom Olden og Utvikfjellet. Turen går gjennom eit variert og vakkert fjordlandskap, med utsikt mot både fjell og fjord undervegs.
Det går buss til Innvik og Utvik, med samband vidare til Stryn, Nordfjordeid og resten av regionen. For oppdatert ruteinformasjon:
Utsikt frå Innvik Fjordhotell @ Innvik Fjordhotell