Ytst mot storhavet ligg Selje – ei kystbygd der natur, historie og levande tradisjonar møtest.
Selje ligg vakkert til inst i Seljevika, omkransa av bratte fjell, ope hav og den karakteristiske sandstranda Seljesanden. Rett utanfor ligg øya Selja, Noregs første pilegrimsstad og landets første bispesete. Folk har reist hit i over tusen år, og den magiske stemninga på øya grip besøkande den dag i dag.
Selje panorama @ Thomas Bickhardt
Ta turen til Selje om våren og få Seljesanden heilt for deg sjølv. Allereie i mai kan går klosterbåten ut til den historiske øya Selja, men kun i helgane. Du kan nyte lange fine turar med vakre solnedgangar langs kysten før sommarsesongen og turistane tek til.
Sommaren er høgsesong, med liv i sentrum, aktivitetar på Seljesanden og daglege båtturar til øya. Dette er tida for strandliv, padling og lange lyse kveldar ved havet.
Hausten gir eit heilt anna uttrykk, med kraftige bølgjer og skiftande vêr langs Stadlandet. På denne tida går du også glipp av den største turistmengda og klosterbåten går kva helg ut september. Dette er ei flott tid for naturopplevingar, fotografering og stillare turar i landskapet.
Vil du oppleve ekte og dramatisk kystvêr så er vinteren den perfekte tida å besøke Selja. Det er noko heilt spesielt å sjå stranda Seljesanden dekt av snø eller sitje inne medan du ser bølgene slå mot land og vinden som tek tak i alt som er. Då kjem det opne kystlandskapet verkeleg til sin rett.
Selje er omgitt av eit variert og dramatisk kystlandskap. Den kvite, langstrakte Seljesanden ligg rett ved sentrum og byr på gode bade- og friluftsmoglegheiter på varme sommardagar. Samstundes reiser fjella seg bratt rundt bygda og gir flotte utsiktspunkt og turmål.
Frå sentrum ser du rett ut mot øya Selja, som stig opp frå havet med grøne bakkar og markerte klipper. Området byr på alt frå enkle turar langs fjøra til meir krevjande fjellturar. Eit populært turmål er dagsturhytta Sjøglytt på Risnakken, som gir panoramautsikt over bygda og øya – ein kort tur frå sentrum.
Langs kysten finn du også gode forhold for aktivitetar som kajakkpadling og surfing, der nærleiken til storhavet gir sterke naturopplevingar.
Hovudattraksjonen i Selje er turen til Selja kloster. Klosterbåten «Selja» tek deg på ein kort båttur frå hamna og ut til den heilage øya. Her kan du vandre i dei same gangane som benediktinarmunkane gjorde for over 900 år sidan, gå opp den smale trappa til toppen av klostertårnet og følgje fotspora til St. Sunniva opp til Sunnivaholet. Guida turar fortel den spennande legenda om den irske prinsessa som flykta til Noreg. For mange er dette ei oppleving som kombinerer natur, historie og magisk stemning på ein heilt spesiell måte.
Selje er også eit godt utgangspunkt for opplevingar langs Stadlandet. Her kan du bli med på guida turar, RIB-opplevingar eller utforske kysten på eiga hand. I sentrum er det tilrettelagt for strandliv, leik og enkle aktivitetar, noko som gjer Selje til ein familievennleg destinasjon.
Foto: Selje @ Saltnwax
Foto: Selje - strand og kirke @ Saltnwax
Selja kloster er eit av dei viktigaste kulturminna i Noreg og eit sentralt pilegrimsmål gjennom mellomalderen. Klosteret vart bygd av benediktinarmunkar tidleg på 1100-talet, til minne om St. Sunniva – Noregs einaste kvinnelege helgen.
Ifølgje legenda flykta Sunniva frå Irland for å unngå eit tvunge ekteskap, og kom i land på Selja utan segl eller årar. Her leid ho martyrdøden i ei hole i fjellet. I år 996 fann Olav Tryggvason relikvia hennar, og Selja vart Noregs første heilage stad – året før kristninga på Dragseidet. Hola kan du besøke den dag i dag.
Kvart år, tidleg i juli, vert Seljumannamessa feira til minne om St. Sunniva og Seljemennene. Selje Prestegard og Pilegrimssenter fungerer i dag som turistinformasjon, kafé og pilegrimsherberge og ligg mellom hamna og Seljesanden.
I dag er Selje eit lite, men aktivt lokalsamfunn med røter i fiske, jordbruk og industri. Samstundes har reiseliv fått ein stadig viktigare plass, med fokus på naturbaserte opplevingar og formidling av lokal historie.
Selje er også eit naturleg utgangspunkt for vidare opplevingar på Stadlandet og i resten av Nordfjord – enten du er ute etter rolege dagar ved havet, eller nye eventyr langs kysten.
Foto: Selja kloster © Terje Rakke / Nordic Life AS / www.fjordnorway.com
Ørsta/Volda lufthamn Hovden: ca. 100 km (ca. 2 timar)
Sandane lufthamn Anda: ca. 75 km (ca. 1 time og 20 minutt)
Ålesund lufthamn Vigra: ca. 140 km (ca. 3 timar og 15 minutt)
Bergen lufthamn Flesland: ca. 360 km (ca. 6 timar)
Det er direktefly frå Oslo og Bergen til Ørsta/Volda og Sandane. Til Ålesund går det også direktefly frå mellom anna Trondheim, London, København, Amsterdam, Frankfurt og Gdansk.
Selje ligg ytst i Stad kommune, inst i Seljevika på Stadlandet, og er tilgjengeleg med bil via fylkesvegar frå både Nordfjord og kysten. Turen ut mot Selje går gjennom eit variert landskap med fjord, fjell og ope hav – ei oppleving i seg sjølv.
Det går buss til Selje og nærliggande område, men tilbodet kan vere avgrensa, særleg utanfor sommarsesongen.
Du kan også reise sjøvegen til Selje. Norled har hurtigbåtruter langs kysten, mellom anna på strekninga Bergen - Selje og Sogn - Selje, med avgangar varierande etter sesong. Dette gir ei flott reiseoppleving langs kysten.
