Stryn

Stryn er for mange den perfekte basen for natur, opplevingar og kos på ferie.

©Marvin Kuhr

©Ruben Soltvedt

©Ruben Soltvedt

Der Stryneelva møter Nordfjorden

Tett på fjorden, fjella og alle opplevingane på Vestlandet ligg Stryn sentrum. Ei av dei vakraste elvane i Noreg snirklar seg gjennom bygda. Stryn er for mange den perfekte basen for natur, opplevingar og kos på ferie.

Tettstaden Stryn ligg der Stryneelva møter Nordfjorden. Her finn du ei bygd med liv og røre, gode tilbod for besøkjande, og eit ideelt utgangspunkt for å utforske både lokale naturperler og verdskjende attraksjonar. Stryn byr på aktivitetar for alle, frå roleg fjordidyll til utfordrande fjelltoppar. Det er kort veg til Loen, Olden, Hjelle og heller ikkje langt frå Geiranger, Lom og Sunnmørsalpane.

Gamle Strynefjellsvegen fjell veg Stryn Helge stikbakke

Gamle Strynefjellsvegen @ Helge Stikbakke

Heile året

Vår

Våren i Stryn er tida da snøen smeltar i dalen medan fjelltoppane framleis er kvite. Tvinnefossen vaknar til liv med kraftig elvebrusing, og toppane Kyrkjenibba, Glitregga og Ringdalshyrna lokkar med påskesnø, medan Skuten og Dagsturhytta byr på fotturar. Dette er ei perfekt tid for dei som ønskjer å oppleve naturen utan sommarens travlaste turistar.

Sommar

Sommaren er høgsesongen i Stryn, og bygda summar av liv. Toppane Gryta, Bergsetnakken, og Årheimsfjellet lokkar turgåarar og du kan kjøle deg ned i dei mange elvane du finn i bygda. Bygda vaknar til liv under Motorfestivalen og Gummibåtfestivalen, og dei lange, lyse kveldane gjev rom for opplevingar langt utover kvelden.

Haust

Hausten gjer Stryn ekstra stemningsfull, og er nok den mest fargerike tida. Dette er ei rolegare tid i bygda, ideell for dei som vil ha meir fred på fjellturane, og å få med seg flotte solnedgangar i eit fargelagt landskap. Lyset blir mjukare og lufta friskare. Når oktober kjem, vaknar bygda til liv igjen under Oktoberfest Stryn, Noregs største oktoberfest, der folk frå heile landet samlar seg for å feire på Nordfjordsk vis.

Vinter

Vinteren forvandlar Stryn til eit vinterparadis. Stryn Vinterski opnar og toppturgåarar finn uendelege moglegheiter i fjella rundt. Langrennsløypene på Ullsheim byr på milevis av preppa løyper og du kan setje deg ned og nyte vintersola på ein av dei mange sætrane rundt om.

Festivalbygda

Stryn er ikkje berre kjend for sin vakre natur. Bygda har også etablert seg som ei festivalbygd som trekker folk frå heile landet året rundt. Visefestivalen og Treskifestivalen tar deg med tilbake i tid og byr på mykje kultur, medan Strynefestivalen byr på friluftsliv og action i juni. Fart og spenning får du på Motorfestival Stryn som fyller gatene med klassikarar og motorbrøl. Er du ute etter noko annleis kan vi anbefale Gummibåtfestival Stryn der heile konseptet handlar om å flyte ned den slangeliknande Stryneelva på gummibåtar. Du vil heller ikkje gå glipp av Strynemessa som byr på marknad og bygdeliv og Oktoberfest Stryn kor folk kjem frå langtveis frå for å feire Oktoberfest på Nordfjords vis.

Festivalane gjer Stryn til meir enn eit reisemål for naturopplevingar – her møtast folk for å dele gleda over musikk, kultur, og fellesskap. Har du moglegheit så anbefaler vi å legge turen hit under ein av dei mange festivalane.

Aktivitetar for heile familien

I Stryn finn du aktivitetar som passer både store og små. I Hydlaparken kan du leike deg i klatreløyper mellom tretoppane og hyle deg gjennom zip-lines, utfordre deg i pumptrackén eller slappe av med ein god kaffi. Om vinteren tek Stryn Vinterski over, og gjev alpinopplevingar i ulike vanskegradar. Toppturgåarar finn uendelege moglegheiter i vinterfjellet, og guida turar er tilgjengelege for dei som ønskjer det.

Stisykling er ei særeigen oppleving i Stryn. Løypenettet mellom Ullsheim og Stryn går gjennom lettkupert terreng med fine setrar og utsikt mot fjord og fjell. På Ullsheim finn du også frisbeegolfbane og på vinteren blir milevis av løypenett preparert og gjev eit flott vinterterreng for klassisk stil og skøyting.

Naturopplevingar og utflukter

Stryn har naturopplevingar i verdsklasse rett utanfor døra. Tvinnefossen er ei av dei mest tilgjengelege fossane i området, og du kan parkere tett på for eit nært møte med kraftig fossefall. Dersom du vil oppleve ekte Vestlandsvegar som krokar og svingar seg fra gard til gard kan du køyre panoramavegen som knyt saman Stryn og Nordfjordeid. For dei som vil høgare til fjells, byr Kyrkjenibba, Gryta, Marsåhyrna og Skuten på Kirkeeide på flotte turer med vid utsikt over Stryn og dei omkringliggjande fjella.

Mat og drikke

Stryn har eit godt utval av serveringsstader som passar ulike behov. Isehaug Kafeteria og Johans Pub er kjende treffstader i bygda, medan Minibakeriet lokkar med ferske bakevarer. Matstova serverer solid husmannskost, og Stryn Kaffebar og Vertshus byr på kaffikultur og godt drikke i hyggjelege omgjevnader.

Praktisk informasjon

Avstand frå flyplassane:

Ørsta/Volda lufthamn Hovden: ca. 80 km (ca. 1 time)

Sandane lufthamn Anda: ca. 40 km (ca. 50 minutt inkludert ferje)

Ålesund lufthamn Vigra: ca. 125 km (ca. 2,5 timar)

Bergen lufthamn Flesland: ca. 245 km (ca. 5.5 timar)

Det er direktefly frå Oslo og Bergen til Ørsta/Volda og Sandane. Til Ålesund går det også direktefly frå mellom anna Trondheim, London, København, Amsterdam, Frankfurt og Gdansk.

Korleis kome seg hit:

skyss.no

nor-way.no

vy.no

Stryn ligg langs Riksveg 15, og er lett tilgjengeleg med bil frå både Ålesund, Bergen og Oslo. Buss går dagleg frå fleire kantar, og det er gode parkeringsmoglegheiter i sentrum.

<% translateTitle(group) %>