Ryssdalshornet

Om

Ligg på hornet 
Ta ein kvil på toppen av Ryssdalshornet. Det er ikkje kvar dag ein føler at ein er midt i eit postkort.

Ryssdalshornet er eit velbrukt fotomotiv. Det er frå Sandane ein ser det best: Den pyramideforma toppen som reiser seg frå Breimsvatnet. Det er lett å finne vegen opp til Ryssdalsstøylen og stien vidare. Nokre plassar må det klyvast litt, og på eitt punkt er det hengt fram eit tau som kan gi drahjelp opp ei bratt kneik. Godt då, å sjå fram til å legge seg flat ut på toppen.

Ta av frå E39 mot Kandal og deretter mot Ryssdal. Etter ein har kryssa elva tek ein første veg til venstre. Det er greit å parkere i nærleiken av kraftstasjonen før skogsvegen tek til å stige. Ruta følgjer først den bratte traktorvegen opp til Ryssdalsstøylen.

Frå støylen er det eit skilt til venstre som viser vegen til toppen. Stien går i nordaustleg retning opp ei bratt li, forbi ein bergvegg der ein må "klyveklatre" litt (det er lagt ut eit tau til hjelp). Etter kvart kjem ein opp på ryggen og følgjer denne søraustover mot toppen.

Ryssdalshornet er ein av Fjordspor-turane - 20 magiske vandreopplevingar i Nordfjord.