#10 Gamle Strynefjellsvegen

Om

"Når eg køyrde den over 100 år gamle vegen, og passerte gamle handlaga murar av nøye tilhogge stein og lange rekkjer av stabbesteinar tenkte eg på begrepet «nokre gonger er sjølve vegen målet». Slik er det med Gamle Strynefjellsvegen. Turistvegen frå Vestlandet til Austlandet er både målbindande vakker og freda. Vegen er i seg sjølv ein attraksjon og vitnemål om eit meisterstykke innan ingeniørkunst frå ei svunnen tid. Det er eit historisk sus over vegen som vart bygd med handmakt på slutten av 1800-talet. Deler av vegen køyrde eg på gamal grusveg som gav ei kjensle av å reise tilbake i tid. Den gamle vegen bydde på store landskapskontrastar".

Fred Syversen

Den over 100 år gamle vegen mellom aust og vest er ei oppleving i seg sjølv. Gamle handlaga murar av nøye tilhogge stein og lange rekkjer av stabbesteinar kjenneteiknar strekninga over fjellet.

I gamle dagar var det mange ruter over fjellet som vart brukt til kløving og riding, men det var strabasiøse og tunge turar. Derfor vart det i 1881 bestemt å byggje veg, og rallarar frå Sverige og lokale krefter gjekk i gang med det tunge anleggsarbeidet. I 1894 stod vegen klar, og den ligg der framleis som eit minnesmerke over ei tid som har gått. Grotli, ved den austre delen av vegen, var frå tidlegare møtepunkt for reisande mellom aust og vest, og i gamle dagar kom mange cruiseturistar hit for å oppleve norsk fjellnatur. Vegen byr alltid på ein vakker køyretur og i sterke haustfarger er den i særklasse. Nasjonal turistveg gamle Strynefjellsvegen går mellom Grotli og Videseter. Strekninga er 27 kilometer lang. Vegen er vinterstengt og er open frå tidleg i juni til snøen kjem - ofte i midten av oktober. Sjå vegvesen.no for oppdaterte trafikkmeldingar

Langs vegen kan du lese om landskapet, geologien og naturen.

I 2009 vart den nasjonale turistvegen utvida mot vest, og den endar no på idylliske Hjelle der det tidlegare var båtforbindelse ovet vatnet til Storesunde.

Gamle Strynefjellsvegen er vinterstengt. I slutten av mai vert vanlegvis vegen opna mellom Videseter og Stryn Sommerski, og jobben med å opne resten av strekninga til Grotli fortset etter dette.


Trafikkinformasjon: vegvesen.no

Lengste tillatte lengde på køyretøy er 12,40 meter.